Kennarar eru í forgrunni 5. október ár hvert en þá er Alþjóðadagur kennara haldinn hátíðlegur. Markmiðið með deginum er að vekja athygli á mikilvægi kennarastarfsins og huga um leið að menntun kynslóða framtíðarinnar.
Við eigum frábæra kennara í skólanum okkar sem daglega mæta margvíslegum áskorunum í störfum sínum og búa yfir miklum eldmóði og metnaði fyrir hönd sinna nemenda. Fyrir það erum við þakklát. Til hamingju með daginn kennarar!
Í morgun fór fram rýmingaræfing undir styrkri stjórn Slökkviliðs Ísafjarðarbæjar. Rýming húsnæðisins tók um 2 mínútur, sem er mjög góður tími, en um 440 manns eru í húsi í dag. Veðrið var eins og best var á kosið og gerði það allar aðstæður betri.
Það er nauðsynlegt fyrir okkur öll að æfa okkur í rýmingu, því flóttaleiðir og söfnunarsvæði þurfa að vera á hreinu svo og hlutverk hvers og eins starfsmanns. Æfingin gekk vel, en við förum ætíð yfir ferlið eftir á og bætum það sem hægt er.
Á morgun, þriðjudaginn 3.október er fyrri foreldradagur/samráðsdagur vetrarins. Nemendur mæta þá með foreldrum í viðtöl til umsjónarkennara á þeim tíma sem þeir velja sér í Mentor og er engin kennsla þann daginn.
Barnamenningarhátíðin Púkinn stendur nú sem hæst, en hún er ætluð öllum grunnskólabörnum á Vestfjörðum og er sú fyrsta sinnar tegundar á svæðinu. Á hátíðinni er boðið upp á ýmsa viðburði inni í skólum og er þema hátíðarinnar sögur og munu öll börn á svæðinu skrifa sögu um eitthvað sem á daga þeirra dreif nýliðið sumar.
Misjafnt er hvað boðið verður upp á á ólíkum stöðum og á mismunandi skólastigum, en kapp lagt á að eitthvað verði í boði fyrir alla. Nefna má ritlistarsmiðjur, gervigreindar-listasmiðjur, kvikmyndagerðarnámskeið og grímugerð. Hátíðinni lýkur 22. september og verða þá lokahátíðir á Ísafirði, Patreksfirði, Ströndum og í Bolungarvík.
Dansarinn Sigríður Soffía Níelsdóttir kom í heimsókn til okkar í vikunni og kenndi nemendum miðstigs dansspor hátíðarinnar og bauð unglingunum upp á danssýninguna Eldblóm. Í dag og á morgun fá nemendur unglingastigs námskeið í gervigreind, með áherslu á gervigreindina í MidJourney þar sem þátttakendur fara í ferðalag sem eykur sköpunargáfu, ögrar ímyndunarafli og valdeflir þá til að skapa list sem er handan hins hefðbundna.
Nánari upplýsingar um barnamenningarhátíðina má finna á heimasíðu hennar
Göngum í skólann 2023 verður sett hátíðlega á morgun, miðvikudaginn 6. september í Helgafellsskóla í Mosfellsbæ. Þetta er í sautjánda sinn sem verkefnið er sett hér á landi.
Grunnskólinn á Ísafirði ásamt fjölda annarra skóla tekur þátt og hefur þátttakendum fjölgað jafnt og þétt með árunum.Fyrst þegar verkefnið fór af stað árið 2007 tóku 26 skólar þátt og í fyrra voru alls 82 skólar skráðir til þátttöku.
Við vonum svo sannarlega að nemendur og starfsmenn taki virkan þátt í átakinu, sem stendur til 4.október n.k.
Það er allt gott að frétta af 7.bekkingum í Skólabúðunum að Reykjum í Hrútafirði. Hópurinn er vel stemmdur og nýtur samverunnar og umhverfisins til hins ýtrasta. Brottför frá Reykjum er kl.17:00 á morgun.
Á hverju hausti fara allir árgangar skólans í fjallgöngur eða gönguferðir. Í upphafi skólagöngunnar er byrjað á að fara upp í Stórurð, en svo smám saman verður gangan erfiðari, en hver árgangur fær úthlutað sinni gönguleið. Þegar grunnskólagöngunni lýkur hafa því allir nemendur kynnst mörgum fjallgönguleiðum hér í kring s.s. upp í Naustahvilft, á Hnífa, Sandfell og Kistufell svo fátt eitt sé nefnt.
Næstu daga skunda nemendur upp um fjöll og firnindi en 4. og 8. bekkur nýttu veðurblíðuna í dag til fjallaferða. 4.bekkur gekk upp í Naustahvilft, en 8. bekkur að Nónvatni.
Nemendur 10.bekkjar sigla á fimmtudaginn í næstu viku (31.ágúst) norður á Hesteyri og ganga þaðan yfir í Aðalvík, þar sem gist verður í tjöldum. Siglt verður heim aftur á föstudeginum. Fleiri árgangar verða á faraldsfæti næstu vikurnar.
Fjallgöngurnar eru ætlaðar til að nemendur fræðist um nærumhverfi sitt og náttúruna, en einnig eru þær mikilvægar til að efla hreyfifærni, samstöðu og félagsþroska nemenda.
Ísafjarðarbær er heilsueflandi samfélag þar sem meginmarkmiðið er að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa. Börn eru þar ekki undanskilin og nauðsynlegt að hvetja þau til daglegrar hreyfingar.
Við viljum hvetja foreldra yngstu barnanna, einkum þeirra sem eru að hefja skólagöngu í fyrsta sinn, til að ganga eða hjóla með börnum sínum í skólann fyrstu dagana. Mikilvægt er að sýna þeim heppilegustu leiðina og benda þeim á hvaða hættur ber að varast. Þess utan er hreyfingin holl og góð fyrir alla í fjölskyldunni og stuðlar að auknu öryggi skólabarna með því að minnka umferð í kringum skólann.
Skólasetning G.Í. verður mánudaginn 21. ágúst 2023 í sal skólans og mæta nemendur sem hér segir:
Kl. 9:00 8., 9. og 10. bekkur
Kl. 9:30 5., 6. og 7.bekkur
Kl. 10:00 2., 3. og 4. bekkur
Nemendur í 1. bekk verða boðaðir sérstaklega ásamt foreldrum í viðtöl til umsjónarkennara. Kennsla hefst samkvæmt stundaskrá þriðjudaginn 22. ágúst hjá öllum nemendum.
Við vekjum athygli á því fyrir nýja bæjarbúa og þá sem eru að skrá börn sín í fyrsta skipti í grunnskóla, að Ísafjarðarbær útvegar grunnskólanemendum sínum ritföng og námsgögn endurgjaldslaust.
Við hlökkum til komandi skólaárs, samstarfsins við nemendur, foreldra og aðra í skólasamfélaginu.
Í haust var hleypt af stokkunum nýju heimilisfræðitengdu vali á miðstigi sem kallast Ræktun, íslenskur matur og menning. Í þessum tímum fást nemendur við hin ýmsu verkefni sem tengjast ræktun, uppskeru og meðhöndlun hráefnis undir stjórn Guðlaugar Jónsdóttur heimilisfræðikennara. Fjórir hópar skiptu með sér skólaárinu og voru verkefni þeirra breytileg eftir árstíma. Hausthópurinn kom eðlilega mest að uppskerunni, þar sem nemendur útbjuggu til dæmis rétti úr grænkáli, sveppum, rabarbara og aðalbláberjum. Strax eftir áramót voru fyrstu fræin sett í mold og fram á vorið voru nemendur reglulega að sá fyrir hinum ýmsu plöntum á milli þess sem þeir bökuðu eða útbjuggu eitthvað í eldhúsinu.
Komið var upp plöntuljósum í heimilisfræðistofunni, sem eru afar gagnleg við plöntuuppeldi. Þegar plönturnar höfðu komist þokkalega á legg fóru nemendur með flestar heim, en hluti þeirra var ætlaður fimmta bekk til að gróðursetja við skólann í vor. Gróðursetningin gekk vel. Nemendur stungu upp moldina í gróðurkerjunum og settu niður allskonar salat, kryddjurtir og sumarblóm. Yfir kerin voru settir plastbogar með gróðurdúk yfir og nú er búið að setja á þau skilti, unnin af nemendum, þar sem sjá má heiti plantnanna á íslensku og latínu.
Að sögn Guðlaugar hafa þessir tímar verið afskaplega gefandi og skemmtilegir. Flestir eða hreinlega allir krakkar hafa gaman að því að rækta plöntur, það er eitthvað mannbætandi við að sjá þær vaxa og dafna - líkt og nemendurna sjálfa! Svo er ómetanlegt fyrir kennara að fá frelsi til að vinna við áhugamál sín, bætir hún við.
